Hareuta Wakaf Bek Sia-Sia

Oleh: Nurjannah Usman

 

Assalamu’alaikum lon pu phon kalam

Seluruh alam gampong ngon kota

Saleum horeumat yang baca koran

Ke mandum rakan lewat udara

 

Tateut panyot wate lampu klam

Wajeb seumayang walau lam sukla

Haba loen seutot wakaf hai rakan

Anjuran Iseulam tasumbang harta

 

Jitoh ujeun baroe that simban

Pade dalam blang jikhem meubura

Keu suai wakaf jino tapeu pham

Bek salah paham dalam bicara

 

Wate geuwakaf le ureueng Islam

Nazir nyang paham geusambot sigra

Beu geu peuguna secara Islam

Harta wakaf nyan bek sia-sia

 

Kadang rumoh lua ngoen dalam

Kadang lapangan bak meu ‘en bola

Kadang tanoh jet peugot kulam

Kadang kendaraan moto ngon honda

 

Kadang peng di dalam trok-trok jutaan

Na syiet tumbuhan lage bak kurma

Kadang lampoh ue luah hana ban

Kadang tanoh blang pade meugunca

 

Mandum harta nyan wakaf  geuboh nan

Nyang na meuiman wajeb peucaya

Wakaf peuguna wahe eu rakan

Bek salah paham meugantoe punya

 

Dari awai phon status beu transparan

Bek dudoe rakan salah peu guna

Na yang ladom bak treb-treb jan

Harta wakaf nyan kana yang punya

 

Allahurabbi lon pujoe Tuhan

Neubri na iman di dalam dada

Leumpah leu dausa wahe eu intan

Harta wakaf nyan menyoe salah guna

 

Mandum talindong wahe eu rakan

Harta wakaf nyan meubek meutuka

Lage geu pesan wate mulaan

Bek wayang-wayang salah peuguna

 

Eunteuk meupaloe ‘oh akhee datang

Meunyoe atanyan salah kelola

Meunyoe butoi lage geu pesan

Gata kelola nyan rayeuk that pahala

 

Pakek jingki wate luah blang

Wate musem blang mu’ue beurata

Kajet keu ‘oh no uloen keumarang

Meuah beu rijang menyoe na salah kata

 

Neuheun, 13 Februari 2020